गुरु तोची ईश्वर
सृष्टी जेणे निर्मिली, ओंकारातुनी साकारीली
तोची ब्रह्मा विधाता, मम हृदयी, मुमुक्षा जागवितो
चैतन्य होऊनी, विश्व अवघे, जो विष्णू चालवितो,
तोची स्वामी विश्वाचा, मम हृदयी, स्फुरण रूपे नांदतो
नव निर्मितीस्तव, अव्याहत जो, ब्रह्मांड संहारी,
तोच महेश्वर विदारक, "अहं" माझा, क्षणोक्षणी ग्रासतो
म्हणोनी गुरु तोची ईश्वर, बह्मा - विष्णू - महेश्वर,
हृदयस्थ, शरणागत वत्सल, त्यांसी सदा नमस्कार
- गणेश देवळे, २४ एप्रिल, २०११
